മഴ

*   *   മഴ     *   *  

ഒരു രാവുകൂടിന്നു പെയ്തൊഴിഞ്ഞൂ.....
ഒടുവിലെ താരവും പോയ്മറഞ്ഞൂ.,
ഓർമതന്നേട്ടിൽ നിന്നോടിയെത്തി-
യൊരോമാൽ കുളിരതെവിടെ നിന്നോ..!
അറിയില്ല, പതിയെ തുറന്നു ഞാൻ ജാലകം..

മിഴികൾക്കു കണിയേകി പൊഴിയുന്നു-

ഹാ മഴ ! ഭൂവിന്റെയതിലോല-

ഭാവങ്ങളുണർത്തുന്നെന്നരികിലായ്..

നിറുകയിൽ പുലർവെയിൽ ചന്ദനം ചാലിച്ചു-

നീരാടിയീറനുടുത്തു നിൽക്കുന്നതാ-

മുറ്റത്തെകൃഷ്ണതുളസിപ്പെണ്ണും പിന്നെ-

മുല്ലയും നാണിച്ചീ, മഴയെത്ര സുന്ദരം.,

മഴതന്നൊരോർമകളതിലും മനോഹരം...

 

 *   *   *   *   *   *   *   *   *    *   *   *   *
 

നീർമണികളായിരം പനംപട്ടതന്നിലാ-

യാരവം തീർത്തോരു കാലമകന്നുപോയ്‌..

നിറകതിർ വയലുകൾ കാറ്റേറ്റിരമ്പുന്ന-

കാലമൊലിച്ചുപോയ്‌ നിറക്കൂട്ടിൽ മാത്രമായ്..

പുതുമഴ മണ്ണിന്നു പുടവകൊടുക്കുന്ന-

പുതുമണം പുസ്തകത്താളിൽ മയക്കമായ്..

മുറ്റത്തെ മാവിൽ നിന്നൊരു മൂത്ത മാമ്പഴ-

മിറ്റുവീഴും കാത്ത മോഹം വിമൂകമായ്..

ഓലക്കുടയുമായ് ഓടിനടന്നൊരെൻ-

ഓമനമുത്തശ്ശി ഓർമയിലുറക്കമായ്..

കമ്പിളിപുതച്ചിട്ടു കടലകൊറിച്ചുകൊ-

ണ്ടുമ്മറക്കോലായി കാക്കുന്ന മുത്തശ്ശൻ,

കാലത്തിനോളത്തിൽ കടലോടലിഞ്ഞുപോയ്‌..

പാതയോരത്ത് മഴ പുഴയായൊഴുകുമ്പോൾ,

പണിതീർത്ത കടലാസു തോണിയും ഓർമയായ്‌..

 

തുള്ളിക്കൊരുകുടം മഴപെയ്തുതോരുമ്പോൾ ,

തുമ്പിയെത്തേടി നടന്നോരു നാളുകൾ..

മഴതൂകി മണിമേഘമോടിക്കളിക്കുമ്പോൾ,

മഴവില്ലു കണ്ടുത്സാഹിച്ച നാളുകൾ..

കടമ്പിന്റെ കൊമ്പിൽ കാറ്റൂയലിട്ടാടുമ്പോൾ,

കളിക്കൂട്ടുകാരിക്കു മഴനേർന്ന നാളുകൾ..

ഇന്നെല്ലാമോടിയോളിച്ചൂ വിരുന്നുകാരായ്...

 

*   *   *   *   *   *   *   *   *    *   *   *   *
 

ഇന്നും മഴപെയ്തു മാനം തെളിഞ്ഞിതാ,

മൗനങ്ങൾ പെയ്തെന്റെ മനവും തെളിഞ്ഞിതാ.,

വേനലിന്നഗാധമാം താപങ്ങളൊക്കെയും-

തൻമടിത്തട്ടിലായലിഞ്ഞു പോവും വിധ-

മിന്നീ വിധം ഭൂമിയുറങ്ങുന്നു മഴതോർന്ന്..

മഴയെന്നതെന്നും മഹാത്ഭുതം മർത്യനു-

സംശയമതിലില്ലയൊട്ടുമേയെങ്കിലും..,

കോടാലിത്തുമ്പത്ത് കാനനം മായുമ്പോൾ..

കോടികൾ വിലയിട്ടു നെൽവയൽ മൂടുമ്പോൾ..

ഇനിയുമൊരു വർഷമോടിയെത്തുമോ-

മണ്ണിന്റെ മുൻപിന്നറിയാത്തൊരീ മൂകയാത്രയിൽ..!

കാത്തിരിക്കാം നമുക്കെല്ലാർക്കുമോന്നിച്ചീ-

കൂട്ടിൽ മഴകൊള്ളും കിളികളോടൊപ്പമായ്...
 

~~~~~~~~~~~~~~~~~~~~~~~~~~~~~~~~~~~~~~~
Copyrighted by : Murali S Kumar
~~~~~~~~~~~~~~~~~~~~~~~~~~~~~~~~~~~~~~~