ശൈവ ശാപം

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

ശൈവ ശാപം

 

ഇല്ലിനി തുറക്കുവാനാവില്ല മിഴികളിതു-

മൂന്നിനും മീതെയാണാക്ക്രമസമസ്യകൾ..

 

അധികാരമതു കൈയ്യിലേന്തുന്ന നിമിഷത്തി-

ലവതാളമാവുന്ന ജനാധിപത്യം..

 

അടിതെറ്റി വീഴ്ത്തുവാനടിവേരറുക്കുവാൻ-

വീണ്ടുമൊരു കൂട്ടം ശവംതീനികൾ..

 

പ്രണയമാഭാസവും പെണ്‍വാണിഭം പുണ്യ-

കർമ്മമായും മാറുമൊരു നാട് മുടിയണം..

 

പെണ്ണിന്റെ കണ്ണീർ നിലയ്ക്കാത്ത നാള്‍വരെ,

പൊന്നും പണവും പ്രതാപവും വെറുതെതാൻ..

 

ജടയിൽ തളച്ചിട്ട ഗംഗാ പ്രവാഹത്തി-

നുള്ളൊരു തപോർജ്ജമത് ജനമറിഞ്ഞില്ല..

 

കണ്ഠം നിറച്ചു വിഷമുണ്ണാനൊരുങ്ങുമ്പൊ-

ഴുണ്ടായതും പെണ്ണ് മാത്രമല്ലോ..

 

കുത്തിപ്പിടിക്കുക, കൂന്തലിഴ പൊട്ടട്ടെ-

യർദ്ധനാരീശ്വര സ്സങ്കൽപ്പമുടയട്ടെ..

 

സംസ്കാരഗോപുരമിടിഞ്ഞു വീഴട്ടെ-

യത് കണ്ടില്ലയെന്നും നീ ധരിച്ചീടുക..

 

സ്നേഹം കളങ്കമായ് തീരുന്നതറിയാതെ-

മോഹം വിരിച്ചിട്ടുയർന്നു പൊയ്ക്കൊള്ളുക..

 

വൈകാതെ ജടയൂരി പ്രളയമായ് ഞാൻ വരും,

അന്നിനിയൊരവസരം വീണ്ടും തരില്ല ഞാൻ..

 

കണ്ണീരു കൊണ്ടെന്റെയുള്ളം ജ്ജ്വലിക്കുന്നു,

കാണേണ്ടയിനിയേതു കപടനാട്ട്യങ്ങളും..

 

ഒന്നല്ല രണ്ടല്ലീ മൂന്നു നയനങ്ങളും-
മൂടിക്കിടക്കട്ടെ മുവ്വുലകും മുടിയട്ടെ..

 

~~~~~~~~~~~~~~~~~~~~~~~~~~~~~~~~~~~~~~~
Copyrighted by : Murali S Kumar
~~~~~~~~~~~~~~~~~~~~~~~~~~~~~~~~~~~~~~~